KOOMIC comeza a distribuír banda deseñada en galego

O pasado sábado Álex Samaranch, director da tenda en liña de comics dixitais KOOMIC, participou nunha mesa redonda dentro do Foro Culturgal no Pazo da Cultura de Pontevedra, e para completar a súa relación coa nosa terra hoxe estreou na súa plataforma de distribución dixital a primeira obra en galego que se edita en KOOMIC, e que non é outra que o primeiro número de Fiz, “a revista do neno máis porco do mundo”, editada por Retranca e con autores como Kiko da Silva, Albert Monteys, Víctor Rivas, Busquet, Álex Fuentes, Fernando Iglesias (Kohell), Mel, Vergara & Olivares, Diego Arandojo & Ed, José Domingo, Jorge García & Sagar ou Jali Labari.
O número 1 de Fiz pode mercarse en galego por 1,59 euros, estando tamén dispoñible unha edición da mesma en español, o que supón a estrea de Retranca na distribución dixital, de xeito que agora as obras desta editorial galega tamén poden seguirse dende o ordenador ou a través de dispositivos móbiles de Apple (dende KOOMIC xa están a traballar no seu salto a Android). A semana que vén agárdase a publicación do número 2 desta revista que en formato físico véndese a 3,50 euros, polo que é un magnífico exemplo de que en soporte dixital pódese optar por uns prezos máis agresivos.