O grupo AF4 do Campus de Pontevedra presenta unha aplicación móbil para combater os sinistros causados pola fauna salvaxe

Alén das tráxicas cifras de accidentes que complementan cada día a nosa ración de datos xornalísticos, as estradas son tamén (cómpre non esquecelo) un regueiro de atropelos de animais. Esta situación, que incrementa o risco a tódolos niveis (a máis fauna salvaxe na estrada, máis sinistros e máis mortes de toda índole), está a experimentar nos últimos tempos nun tráxico repunte nas nosas vías, sobre todo as das provincias do norte. Como combatelo alén das clásicas medidas? É posible que as tecnoloxías do coñecemento e da comunicación teñan algo que dicir? A xuízo das responsables do grupo de investigación AF4 da Universidade de Vigo, Campus de Pontevedra, si que teñen algo que dicir. Das súas mans vén de abrollar, de feito, unha ferramenta de sinalización persoal que nos pon ao tanto, mentres conducimos, dos puntos de máximo perigo por aparición de animais.
A aplicación tecnolóxica ten conexión directa co móbil, indicando a través del os treitos de meirande risco, e compleméntase con sinais luminosos e dinámicos que entrarían en funcionamento nos intres do día de meirande taxa de perigosidade. Esta ferramenta tería un especial aproveitamento da nosa terra, que, malia non destacar a nivel europeo pola elevada densidade poboacional das especies, conta con poucos espazos onde estean ben delimitados os hábitats humanos e os animais. De feito, sobre todo nas provincias máis habitadas, todo se mestura, debido a que contamos cunha poboación moi espallada que transita por estradas que cruzan por áreas ocupadas claramente pola fauna salvaxe.
O traballo que presenta o grupo AF4 baséase nunha base de datos coas descricións de 6.000 accidentes ocorridos dende 2006, o que serviu entre outras cousas para elaborar pautas temporais e espaciais dos sinistros. Observouse, por exemplo, que no mes de abril e maio concéntranse a maior parte de accidentes provocados polo corzo, “período do ano que coincide coa súa época reprodutora”, salienta o grupo. Pola contra, o xabaril causa un maior número de sinistros entre os meses de outubro e xaneiro, a maior parte deles concentrados entre novembro e decembro, “ben pola coincidencia co período de caza, ben por ser a época do ano coas noites máis longas, pois o xabaril é de hábitos nocturnos”.
O proxecto do grupo de investigación AF4 da Escola de Enxeñaría Forestal foi presentado á convocatoria europea Eurostars, en cooperación con investigadores da República Checa e coa spin off galega Geodem, sendo aceptado e pendente da resolución final.