Santiago incorpora un servizo de teletradución a 51 idiomas en varios organismos de axuda a persoas necesitadas

Dende hoxe, calquera muller da nacionalidade que sexa que pete na porta Centro de Información á Muller de Santiago de Compostela para solicitar a súa axuda, poderá facelo practicamente sen ningún tipo de barreira idiomática, pois esta entidade vén de incorporar un servizo de teletradución a 51 idiomas distintos, que permitirá mellorar a atención ás mulleres e vítimas de violencia de xénero.
O servizo entrou en funcionamento ao abeiro dun convenio de colaboración asinado hoxe entre Igualdade e o Concello de Santiago, nun acto no que unha usuaria de orixe romanesa, demostrou in situ o funcionamento da aplicación.
Segundo informan dende a Secretaría da Igualdade, esta entidade decidiu facer extensiva a teletraducción á rede de CIMs de Galicia “despois de acreditar, durante un ano, a súa utilidade no Teléfono de Información á Muller”, e anunciou que fará extensivo este servizo de balde ás casas de acollida e ONGs que o soliciten.

Ata o de agora, xa son 45 o total dos CIMs que manifestaron o seu interese por adherirse ao sistema de teletradución, que na capital galega xa está operativo tamén en Cáritas e Médicos do Mundo.
A través da plataforma de teletradución, as mulleres que descoñecen a nosa lingua e precisan algún tipo de axuda por parte da Administración, terán a seguridade dun acceso axeitado á información e aos recursos dispoñibles, sobre atención psicolóxica, prestacións económicas, centros de acollida ou asesoramento xurídico,entre outras cousas, na súa propia lingua.
O sistema permite que as usuarias poidan comunicarse telefonicamente cunha intérprete desde calquera centro no que se atopen (ben sexa un CIM, unha casa de acollida ou calquera entidade adherida) así como establecer unha chamada a tres, na que interactúen a usuaria, a persoa profesional da entidade e a intérprete.
Durante o seu primeiro ano de funcionamento no Teléfono de Información á Muller de Galicia os idiomas máis demandados foron o romanés, o chinés e o árabe.