CuVitt: novo servizo curricular que amosa as expectativas e a traxectoria dos demandantes

Nos servizos web que axudan a pór en contacto a quen demanda e quen ofrece emprego, non abonda con acubillar currículos e datos das empresas. Hai que facer algo máis, xa que a Rede actual, e sobre todo o maxín dos desenvolvedores, así o permite. Nesta liña é onde se insire o servizo CuVitt, do que tivemos constancia a través de Kaleidos, firma de software libre responsable do mesmo. Segundo informa, trátase dunha ferramenta en liña directamente encamiñada a pór un aquel máis de intelixencia e utilidade no eido dos acubillos dixitais curriculares. De feito, é quen de avaliar a habilidade, as expectativas e a traxectoria do candidato.
E faino convertendo en datos as características das persoas, infórmase, sendo o seu obxectivo incrementar ao máximo o grao de axuste inicial da persoa ao posto que se ofrece, “xa que só un 7% dos profesionais se sente de verdade representando polo seu currículo”, engádese. Deste xeito, as persoas que dean forma ao seu CuVitt particular, ao xeito dunha rede social con compartimentos individuais, poderán ser atopadas non só pola súa formación e a súa experiencia, senón por outros parámetros como por exemplo a expectativas do candidato e o seu talento para unha función determinada. CuVitt, que é o froito de máis de dous anos de investigación sobre estándares de mercado e teorías psicolóxicas, está construído sobre software libre. “O uso dos códigos abertos como os que proceden de Instagram ou Pinterest”, sinala Kaleidos, “foi clave para que se puidera realizar a tempo e coas mellores tecnoloxías”.