Os Resentidos convocan a colaboración dos seus seareiros no Facebook para o seu vídeo de regreso

Antón Reixa volve estar no resumo de actualidade TIC da semana, logo de ter pasado recentemente pola nosa web con motivo da posta en marcha de GalegoLab ou, xa máis preto, por ter participado arreo na última edición de Nethinking, na Illa de San Simón. A novidade da que estamos a falar ten na súa orixe o regreso dos Resentidos, banda que contaba con Reixa entre as súas fileiras e que pasou á nosa historia musical por ser unha das que máis camiños lle abriu á expresión creativa, popular, moderna, na nosa lingua. O caso é que Os Resentidos volven tamén na Rede, cunha iniciativa en Facebook que nos vai dar marxe para sermos os protagonistas dun vídeo de seu.
Esta peza, cóntase dende Praza Pública, presentarase no concerto da banda previsto para o 12 de maio na cidade de Ourense. A metodoloxía para participar na peza colectiva será a seguinte: facéndonos unha fotografía termando dunha das frases de Galicia Caníbal, escrita sobre calquera soporte (dende un folio en branco ata o que se nos ocorra, pero que se lea) para irmos completando o tema. O prazo para concorrer nesta iniciativa remata este mércores 28. As imaxes que se están a xerar xa se poden votar na Rede. As que máis gusten formarán a estrutura e o miolo do dito vídeo resultante.