Mañá celébrase no CDTIC unha sesión demostradora de solucións TIC para estacións de servizo e gasolineiras

O Centro Demostrador TIC de Galicia acolle mañá a presentación dunha plataforma tecnolóxica para optimizar a xestión das estacións de servizo e gasolineiras do noso país, que organiza a empresa PROM Sistemas Informáticos, afincada en Ourense.
A xornada vai dirixida aos responsables e traballadores deste tipo de establecementos e dará comezo a partir das 10:00 horas, para, durante unhas 3 horas, afondar nos distintos aspectos e vantaxes que presenta a plataforma modular Alf@ ERP Hidrocarburos, deseñada para cubrir as necesidades actuais do sector dos hidrocarburos na venda e distribución de carburantes.
A asistencia é de balde, condicionada ao aforo do local e previa inscrición en liña a través do portal web do Centro Demostrador TIC.
Alf@ ERP Hidrocarburos é un sistema de control total do negocio para empresas relacionadas co sector de hidrocarburos que permite automatizar todas as actividades de xestión que se teñan que levar a cabo nelas.
Desta maneira, permite controlar, entre outras cousas, a entrada e saída de carburantes, levar a contabilidade, controlar os surtidores e o stock de combustible, despachar todo tipo de produtos tanto da tenda de alimentación e bebidas como dos accesorios do automóbil, e mesmo manexar as contas correntes das empresas que se abastecen no establecemento, o que libera aos empregados e xestores dunha boa carga de traballo e responsabilidade.
As persoas asistentes á sesión demostradora poderán comprobar de primeira man cómo este programa galego de xestión para estacións de servizo resolve as súas necesidades de control, “sumándolle ademais, a velocidade de operación e emisión de comprobantes”, indican os seus responsables.
“Así”, engaden, “constitúe unha solución deseñada para cubrir todos os requirimentos diarios, complementada cun programa de xestión comercial que permite levar a administración completa do negocio (xestión e administración comercial, fiscal, financeira e analítica)”.
A sesión rematará ao mediodía coa presentación dunha solución innovadora de Terminal de Venda e Autopago desatendido, adaptable, segundo afirman, a todo tipo de surtidores, que estará instalado no Centro Demostrador TIC para facilitar que os asistentes poidan comprobar in situ as vantaxes que pode proporcionar ao seu negocio.