O CPETIG presenta nova feitura web

O Colexio Profesional de Enxeñaría Técnica en Informática, o CPETIG, vén de presentar a súa nova páxina web, unha remodelación da plataforma corporativa de seu cara aos novos tempos 2.0, participativos e con camiños abertos e activos nas máis variadas canles e servizos de información. A nova web salienta por achegar unha nova estrutura de contidos que potencia os datos e os servizos ofrecidos, liberando de todo obstáculo o espazo comprendido entre o miolo da web e o usuario. Entre os servizos que se potencian están Corpo Oficial de Peritos (COP) ou a Bolsa de Emprego.
A nova páxina, adaptada á imaxe corporativa do Colexio, impulsa tamén os contidos privados e de acceso exclusivo para colexiados, como o cartafol de documentación ou os detalles de ofertas de emprego. Outra das grandes novidades é a posibilidade de actualización dos datos de contacto polos propios colexiados a través do seu perfil. “A nova web permitirá ademais a inscrición en liña a todas as actividades formativas que poña en marcha o Colexio Profesional de Enxeñaría Técnica en Informática”, informan fontes da entidade profesional galega. Dentro dos novos contidos e, co fin de cumprir coas necesidades legais (Lei 25/2009 do 22 de decembro), será publicada na web a listaxe de membros do Corpo Oficial de Peritos, así como a listaxe de colexiados do CPETIG.