A Rede CeMIT anuncia a celebración de novos cursos nas vindeiras semanas

Hoxe comezaron nas aulas CeMIT de 24 localidades galegas unha serie de sesións sobre posicionamento web, nas que se analizarán, ao longo de 15 horas, as ferramentas e técnicas máis empregadas na actualidade para mellorar a posición dunha web en Internet.
A actividade, na que participan 236 persoas en total, forma parte do Programa de Dinamización 2012 da Rede CeMIT, e para o seu desenvolvemento empréganse os sistemas de videocolaboración e de videoconferencia, dependendo das aulas nas que se atopen os usuarios.
A técnica de videocolaboración permítelles aos participantes comunicarse entre si en tempo real a través de imaxe e chat, así como compartir e controlar aplicacións remotas; mentres que, por outra banda, a popular videoconferencia permite que dende a distancia se poidan desenvolver actividades non presenciais, grazas aos equipos audiovisuais e multimedia que teñen as aulas máis modernas.
Nesta nova edición, o Programa de Dinamización conta ademais con outras cinco actividades de 15 horas de duración, que versarán sobre televisión en Internet, deseño gráfico, retoque fotográfico, community manager ou streaming de audio e vídeo, entre outros temas.
A maiores, celebraranse outras dúas actividades máis amplas, de máis de 40 horas, sobre produción audiovisual e creación multimedia.
As persoas interesadas en participar poderán informarse das datas de comezo de cada actividade nas aulas CeMIT da súa localidade; por teléfono chamando ao 981 552 568; ou en Internet na web oficial da Rede CeMIT, onde tamén poderán reservar praza e rexistrarse.