O CDTIC acolle esta semana un obradoiro sobre cloud computing para empresas TIC

O Centro Demostrador TIC de Galicia acollerá, mañá mércores 23 e o xoves 24 de maio, un taller sobre tecnoloxía na nube ou cloud computing, que ten por obxecto ofrecerlles aos empresarios do país as solucións tecnolóxicas que teñen ao seu alcance para mellorar as súas xestións, así como mostrarlles dende outra perspectiva un novo referente do modelo de negocio.
O cloud computing, ademais de permitirlle ás firmas aforrar tempo e custes nas súas xestións, está a xerar novos modelos de negocio e cambiando a forma de prestar servizos de moitas empresas do sector TIC do noso país. O obxectivo deste obradoiro, posto en marcha pola Xunta de Galicia, é introducir ás persoas asistentes en aspectos como os modelos de negocio, a seguridade ou a regulación legal da tecnoloxía na nube, e facelo de xeito práctico, a través de varios exercicios que os e as asistentes experimentarán de primeira man.
O taller celebrarase en horario de mañá entre as 09:00 e as 14:00; e en horario de tarde de 15:00 a 19:00 durante os dous días, e está distribuído en módulos teóricos combinados con diferentes casos prácticos.
A xornada abrirase cunha charla maxistral de hora e media de duración, da man do enxeñeiro Antonio De Toro, director Comercial da empresa ACT, en palabras dos organizadores do evento, “pioneira en España na comercialización de servizos de software a través da nube”.
O resto do obradoiro será impartido polo enxeñeiro Rafael Martín Espada, responsable do Departamento de Innovación Tecnolóxica de Asesores e Consultores en Administracións Públicas, ACAP e recoñecido experto en materia de cloud.
Martín, que foi ademais Director Xeral de Telecomunicacións para a Sociedade da Información da Junta de Extremadura, así como profesor da Universidade de Extremadura, conta con ampla experiencia neste tema e responderá ás cuestións que os asistentes lle formulen.
As prazas para asistir ao Obradoiro son limitadas, polo que é necesario inscribirse previamente en liña a través da web do Centro Demostrador TIC.