Vigo acolle dende mañá un Curso sobre novos modelos de negocio no sector TIC

A Asociación empresarial do sector TIC de Galicia, INEO, que está a apostar forte por formar aos seus asociados e asociadas en todo o que ten relación coa xestión das súas empresas, vén de anunciar a celebración dun novo curso formativo, que desta volta vai encamiñado á xeración de novos modelos de negocio.
A actividade, que vai dirixida principalmente ás empresas do sector TIC, dará comezo mañá xoves, 24 de maio, a partir das 18:00 e ata as 20:00 horas, e desenvolverase en cinco sesións formativas repartidas nos xoves seguintes ata o 21 de xuño.
As clases terán lugar na Aula Formativa do Consorcio Zona Franca de Vigo, onde INEO ten as súas instalacións, e serán impartidas por Lucía Gregorio, directora xeral da Asociación, quen tomará como referencia a metodoloxía do libro Xeración de novos modelos de negocio, de Alexander Osterwalder & Yves Pigneur, o cal achega exemplos de metodoloxías que lle poden servir ás empresas “como base para analizar as súas estratexias de negocio actuais”, afirman.
Segundo engaden dende a entidade, as sesións de formación están orientadas, sobre todo, a directores xerais e empresarios do sector TIC, así como a directivos de estratexia e CEOs.
O curso é de balde para empresas socias de INEO e ten un custe de 120€+IVE para as empresas non asociadas. As prazas son limitadas porén as persoas interesadas aínda poden inscribirse no teléfono 986 112 570 ou a través do correo ineo@ineo.org.