Máis da metade dos españois seguen sen pagar por un móbil novo

Malia que todo indicaba que as operadoras de telefonía do noso país ían deixar de subvencionar terminais en canto aplicaran as políticas anunciadas, semella que o panorama non cambiou demasiado dende o aviso, e máis da metade dos españois conseguiron o seu último terminal totalmente de balde.
Así o indica un informe sobre hábitos de compra, posesión, gasto e uso de telefonía móbil de Kantar Worldpanel, que afirma que un 54,7% dos novos terminais adquiridos nos últimos 2 meses foron gratis.
Kantar indica que apenas un 1,6% dos novos terminais foron financiados para ser pagados a prazos (unha modalidade que non acaba de callar aquí en España), mentres que un 43,7% foi adquirido mediante pago único.
O usuario pagou uns 51 euros de media polo seu novo terminal de última xeración, tan só uns 10 euros máis do que pagou en abril deste ano, e tres euros máis que en maio (48 euros).
Por outra banda, o estudo indica que os usuarios que deciden renovar o seu antigo móbil non soen desfacerse del, pola contra, soen “alongarlle a súa vida útil” ao traspasárllelo a outras persoas.
De feito o 13% dos usuarios que adquiriron un móbil no último mes regaláronlle o antigo a outra persoa, e só un 2,4% decidiu entregalo na tenda onde compraron o seu.
Malia que son moitas as persoas que aínda recibiron o seu último terminal de balde, Kantar afirma que “o panorama non é tan desolador para as operadoras”, posto que recuperaron a caída de renovacións de maio sen superar, iso si, as cifras rexistradas nesta época o ano pasado: un 22% máis.