Pontevedra estrea unha nova Aula CeMIT para a formación en novas tecnoloxías

A Deputación de Pontevedra, implicada de cheo na formación da cidadanía no uso das novas tecnoloxías, vén de estrear unha nova aula CeMIT na localidade, que dispón de ata 28 postos informáticos conectados á Rede para o seu uso libre, e de balde, por parte dos veciños e veciñas da zona.
A aula, que ocupa un espazo de 96 metros cadrados, foi inaugurada polo conselleiro de Presidencia, Administracións Públicas e Xustiza, Alfonso Rueda, e a directora da Axencia para a Modernización Tecnolóxica de Galicia (AMTEGA), Mar Pereira, que viaxaron ata Pontevedra para reunirse alí co presidente de Deputación, Rafael Louzán, o outro encargado da inauguración do centro público.
A Xunta investiu para a posta en marcha deste centro, situado nas dependencias do Edificio Administrativo da Deputación Provincial de Pontevedra, un total de 82.000 euros cofinanciados con Fondos Feder, e segundo afirman, cumpren así “o compromiso de que cada galego teña unha aula CeMIT a menos de trinta minutos do seu lugar de residencia”.
Nesta comarca o Plan de Formación de Banda Larga da Xunta “incrementou a cobertura de Internet do 77% existente en 2009 a máis do 98% a día de hoxe”, afirman. O obxectivo é dotar de conexión á rede ao 100% dos galegos a finais de 2013 e seguir a ofrecer cursos de balde en toda a Rede CeMIT para completar así outro dos obxectivos fundamentais do Executivo no tocante ás TIC.
Neste senso, o Plan de Formación da Rede CeMIT para este 2012 triplica a oferta do ano pasado con 3.000 cursos gratuítos.