Vulneran a seguridade da PlayStation 3

A PlayStation 3 recibe hoxe unha actualización do seu software de sistema á versión 4.30, tras problemas para facer tal a semana pasada, pero por desgraza para Sony esta non é a nova sobre a súa consola doméstica que está a reinar nos foros especializados, senón que é o feito de que están a circular as chaves LV0 da PS3, de xeito que a seguridade da consola queda totalmente comprometida como acontecera en xaneiro de 2011, polo que espérase que a historia se repita, de xeito que todos os xogos lanzados ata hoxe serían susceptibles de ser pirateados, podendo Sony só protexer os seus lanzamentos futuros mudando a chave filtrada.
Ata o momento os usuarios con consolas PlayStation 3 modificadas tiñan un acceso limitado aos xogos desta consola, por ter que mantela ancorada na versión 3.55 do firmware (modificada para poder correr copias de xogos), pero coa chave LV0 que circula pola Internet sería posible adaptar un firmware moderno para executar xogos publicados nos 2 últimos anos (xunto con todos os comercializados anteriormente) e, de feito, algúns destes firmwares personalizados xa están dispoñibles para a súa descarga, aínda que en versións pouco maduras (a súa instalación pode deixar a consola inservible).
Ao parecer, os descubridores destas últimas chaves da PS3 decidiron publicalas libremente na Rede para evitar que alguén aproveitase o seu traballo para sacar proveito económico (lembremos que existe un importante mercado de dispositivos USB que axudan a modificar as consolas domésticas de Sony).
Falta agora ver a reacción de Sony, que é de agardar que mova ficha nos vindeiros días, en boa medida porque estamos a poucas semanas da campaña de Nadal, e non tomar medidas antes podería prexudicar seriamente ás vendas das súas grandes apostas para o peche do ano.

Vídeo no que amosan un firmware recente da PS3 modificado