HERE Maps estrea aplicación para iOS

Hai só unha semana Nokia presentaba a plataforma de servizos de xeolocalización HERE, que apostaba pola multiplataforma, e que inicialmente estaba dispoñible en terminais de Nokia de xeito nativo e para outros fabricantes vía web, mentres preparaba as aplicacións para o resto de plataformas, e hoxe mesmo sorpréndennos estreando a aplicación universal para iOS HERE Maps, unha interesante alternativa aos patéticos Apple Maps, que aínda chega nunha versión moi verde, con interface só en inglés e prestacións bastante limitadas que para moitos abre a porta para que Google Maps volva os dispositivos móbiles de Apple en breve.

HERE Maps permite ver mapas en distintas vistas (mapa, tráfico en directo, transporte público e vista de satélite), deixa gardar en local zonas xeográficas para a súa consulta cando non teñamos acceso á Rede, permite a personalización de mapas por parte de usuarios, permite compartir localizacións a través de SMS, correo electrónico e redes sociais, conta coa posibilidade de organizar coleccións de lugares para a súa consulta posterior (ideal na programación de viaxes) e tamén calcula rutas. Tamén inclúe guía GPS por voz, pero polo momento limítase a percorridos a pé, as súas imaxes vía satélite aínda teñen pouca resolución para o noso territorio e algunhas das súas prestacións avanzadas (como as vistas 3D ou a pé de rúa) só están dispoñible a través da súa páxina web (consultada dende un ordenador).
Aínda que esta ferramenta poida ter a súa utilidade, continúa a estar a medio camiño do que ofrecía para iOS a aplicación de Google Maps. De todos os xeitos temos que recoñecer que HERE Maps está na súa primeira versión, de xeito que nas vindeiras semanas chegará a máis plataformas móbiles e, unha vez establecida a súa base, podemos agardar unha importante evolución do servizo durante 2013, que é o ano no que Nokia comentou que ían a esforzarse na exploración masiva das rúas de numerosos países para achegar uns mapas de calidade e con prestacións claramente diferenciadas coas dos seus competidores.