España é o país con máis uso de Mega na súa primeira semana en liña

A unha semana da posta en marcha de Mega, servizo sucesor de Megaupload, Kim Dotcom publicou a través de Twitter a listaxe de países que están a mover máis datos neste almacén de arquivos en liña e vemos que España consegue quedar nunha primeira posición, país ao que seguen Brasil, Francia, Países Baixos e Nova Zelandia, matizando que o tráfico de Francia, Brasil e Alemaña está a coller pulo, polo que España podería perder a posición líder esta mesma semana.
Tras un accidentado inicio, Mega parece estar xa a funcionar con certa normalidade, non só conseguindo que sexa posible darse de alta como usuario e cargar e descargar ficheiros, senón tamén respectando as reclamacións por vulneración de copyright, pois están a dar conta de que están a responder eliminando os ficheiros denunciados en menos de 48 horas, aínda que resulta difícil saber se poderán manter tal axilidade de popularizarse tal práctica, pois ata o momento só recibiron 5 reclamacións, o que é un número moi reducido se temos en conta que os usuarios están a cargar 500 ficheiros por segundo aos servidores de Mega.