Xa hai gañador no certame lanzando en Twitter para celebrar os 150 anos de Cantares Gallegos

Finalmente xa hai gañador do certame convocado hai dez días na rede social Twitter pola Editorial Galaxia e co obxectivo de conmemorar os 150 anos de Cantares Gallegos, de Rosalía de Castro. O concurso, que tamén se puxo en marcha para celebrar a festividade do Día das Letras Galegas (de feito, coincidiu coa preparación do mesma por parte de múltiples entidades culturais da nosa terra), consistiu en animar ás/aos seareiras/os da dita comunidade 2.0 a explicar o porqué da importancia de Rosalía para elas e eles, para as súas vidas e para a nosa cultura.
Logo de recibir arredor de duascentas propostas e de valoralas todas en detalle, o xurado decidiuse polo chío de Paulo Calvo, que di o seguinte: #rosaliasempreporque miña bisavoa levaba Cantares Gallegos cando ía ó monte coas vacas.
“Se Rosalía no seu tempo”, sinala Galaxia ao respecto desta achega e das razóns para tela premiado, “destacou como poeta popular, e o pobo galego, era quen de aprender os seus poemas de memoria, este chío volve lembrarnos ese carácter de poeta nacional que a autora conseguiu dende o momento inicial da publicación dese libro fundacional”. O premiado recibirá nos días vindeiros un lote de libros de Rosalía de Castro, sobre Rosalía de Castro, así como sobre o seu home, Manuel Murguía.