Socioloxía da UDC acolle un novo ciclo das conferencias sobre redes sociais e participación cidadá

A Facultade de Socioloxía da Universidade da Coruña acollerá a partir do venres, 31 de maio, a cuarta entrega do Ciclo de Conferencias Sociedade en movemento, redes sociais e participación cidadá, un evento divulgativo e de análise que, como o seu propio nome indica, diríxese a avaliar o potencial dos nosos servizos tecnolóxico-dixitais no camiño de recoller a testemuña de recursos tradicionais de convocatoria social como foros, casas do pobo, sedes asociativas, etc. O primeiro relatorio terá lugar o día 31 ás 12:00 horas no salón de graos, a cargo de Miguel Vale de Almeida, profesor de Antropoloxía do Instituto Superior de Ciencias do Traballo e a Empresa de Lisboa (ISCTE), que falará sobre a xestión da diversidade cultural vista desde as teorías poscoloniais.
Licenciado en Antropoloxía na Universidade Nova de Lisboa e mestrado na State University of New York, o profesor conta cun destacado currículo académico, desde o doutoramento en Antropoloxía no ISCTE no 1994 ata o cargo de director do Mestrado en Antropoloxía na especialidade Multiculturalismo e Identidades e Colonialismo e poscolonialismo do ISCTE que ostenta na actualidade. Ademais é director da Revista Etnográfica editada polo ISCTE e as súas liñas de investigación principais abranguen os estudos das consecuencias do colonialismo, a raza, a etnicidade, e a etnopolítica, xunto co xénero, a sexualidade e o corpo.