Ourense e Santiago acollen esta semana cadansúa xornada sobre o potencial do iPad no contexto empresarial

Esta semana, a Cámara de Comercio de Ourense (avenida da Habana) e o Centro Sociocultural das Fontiñas en Santiago acollen dúas actividades de introdución ao potencial para as nosas empresas do dispositivo iPad. Máis polo miúdo, serán dúas sesións de consultoría exclusiva, a cargo dos profesionais da cadea galega AS Computer, para unha posta ao día no funcionamento do devandito trebello en contornas empresariais. A primeira cita é en Ourense, este martes 4 a partir das 17.00 horas, e mañá será a quenda do Centro Sociocultural das Fontiñas de Santiago Compostela.
As charlas, ás que acudirán representantes de ámbolos Concellos, achegarán aos profesionais diferentes recursos tecnolóxicos para seren empregados a nivel corporativo, no día a día comunicativo e informativo dunha empresa. Nas sesións abordaranse temas como a integración, a implantación e máis a seguridade. Tamén se amosará o potencial de diversas aplicacións de empresa e solucións de mobilidade de recursos en liña. As citas darán comezo ás 17:00 horas. Os interesados en inscribirse ou solicitar máis información poden enviar os seus datos a web@asmaccenter.com.