O Apóstolo, premiada nun dos certames de animación máis recoñecido: o Festival de Annecy

A película galega O Apóstolo recibiu esta fin de semana o Premio do Público no Festival de Cine de Annecy (Francia), sen dúbida un dos máis prestixiosos do país (con perdón do de Cannes), e máis do mundo en materia de animación. O santiagués Fernando Cortizo, director do filme galardoado, recibiu o recoñecemento da man de Marcel Jean, director do certame, nun acto desenvolvido en La Salle des Haras. Entre os asistentes estaba Brian Miller, vicepresidente dos Cartoon Network Studios e membro do xurado, e tamén Eric Goldberg o xa histórico debuxante de Disney.
Para os responsables de O Apóstolo, este premio outórgalle un importante pulo á película galega, xa que o público do festival está formado exclusivamente por profesionais do sector, “cun alto nivel de esixencia”. Segundo engade o equipo de Fernando Cortizo, este festival, creado en 1960, é o referente na industria da animación. A programación deste ano contou con 236 películas seleccionadas, das casi 2.500 recibidas de 88 países. En edicions anteriores, cintas coma Coraline, James e o Melocotón Xigante ou Fantastic Mr.Fox acadaron o Premio Le Cristal.
Lembrar que O Apóstol, como temos sinalado en Código Cero, resultou ser un filme innovador dende tódalas frontes: en canto ao desenvolvemento do mesmo (a través da técnica do crowdfounding, procurando apoios orzamentarios a través das redes) e tamén no que se refire ao seu sistema de rodaxe. Usouse unha metodoloxía nunca antes empregada, a animación stop-motion en 3D mesturada coa participación directa dos actores que reais que dan vida aos personaxes virtuais nos que se inspiran. Así, os actores protagonistas da versión española –Jorge Sanz, Geraldine Chaplin, Paul Naschy, Carlos Blanco, Xosé Manuel Olveira Pico, Luis Tosar, Manuel Manquiña, Celso Bugallo, Isabel Blanco e Pedro Alonso, entre outros– non lles cederon soamente a súa voz aos monecos que dan vida aos personaxes, senón que eles mesmos interpretaron previamente todas as escenas.