A chinesa Xiaomi xa é maior que BlackBerry

Os últimos dous anos están a ser especialmente movidos no mercado chinés da telefonía móbil, coa emerxencia de fabricantes que están a conseguir certa repercusión internacional, e unha das compañías que poden tomarse como exemplo é Xiaomi, que cun valor estimado de 10.000 millóns de dólares presume de ser a cuarta compañía de Internet máis importante da China (só detrás de Ali Group, Tencent e Baidu) mentres que no sector do hardware só veríase superada por Lenovo.
Nestes 2 anos conseguiu vender 15 millóns de terminais e a súa versión de Android (MIUI) conseguiu chegar aos 20 millóns de usuarios, conseguindo unha relevancia difícil de prever hai uns meses, especialmente polo feito de que a compañía chinesa tería actualmente un valor de mercado que estaría preto de dobrar o da canadense BlackBerry.
Xiaomi destaca por vender móbiles de altas prestacións a prezos máis propios de gamas media-baixas, e o vindeiro 5 de setembro teñen previsto anunciar os seus novos produtos nunha conferencia no Centro de Convencións Nacional de Pequín. Entre as novidades da compañía rumoréase que estará o seu Xiami MI3 (un smartphone con pantalla de 5 polgadas, procesador de 4 núcleos, 2 Gb de RAM, cámara de 13 Mpíxeles e xenerosa batería) e un novo dispositivo de Smart TV baseado en Android (atendendo ao éxito da súa solución actual).