Sancionan a dúas empresas españolas por vulnerar a Lei de Cookies

Nos últimos meses boa parte das páxinas web que visitamos con frecuencia amosaban unha alerta advertido do uso de cookies para facer un seguimento do usuario que nuns casos é para uso estatístico e noutros ten un carácter máis técnico que facilita que o espazo web poida funcionar con normalidade, pero este molesto aviso estaba realizándose por un único motivo: un cambio lexislativo que obrigaba a facer tal. Ao parecer, son moitas as empresas que non son conscientes desta regulación, o que levou á recepción de varias denuncias que levaron á Axencia Española de Protección de Datos (AEPD) a pór mans no asunto, coñecéndose xa a primeira resolución sobre o tema (dispoñible para a súa descarga en formato PDF), na que condenan a Navas Joyeros Importadores, S.L. e Privilegia Luxury Experience, S.L. a pagar 3.000 e 500 euros respectivamente por non respectar a normativa sobre cookies recollida na Lei de Servizos da Sociedade da Información, ao que habería que engadir unha sanción de 1.500 euros á primeira empresa por vulnerar a Lei de Protección de Datos ao non especificar o tratamento que fai dos datos dos seus clientes que recolle a través da súa web.
Na resolución detállanse o uso de cookies de servizos como Google Analytics, Google Maps, YouTube, WordPress, Zopim, Quantcast, Seevolution, Google e DoubleClick, moi habituais na Internet, e que serven para levar estatísticas de uso da páxina web, almacenar preferencias do usuario, controlar a publicidade ou mesmo permitir o bo funcionamento dunha plataforma de comercio electrónico, que non suporían ningún tipo de intromisión para o usuario sempre que se tivesen notificado do seu uso.
Sorprende ver como a AEPD actúa contra empresas tan pouco significativas, cando a meirande parte das grandes empresas españolas non cumpre coa coñecida como Lei de Cookies (que non e tal, pois trátase simplemente dunha modificación da LSSI-CE realizada en 2012) que por moitos expertos está considerada como inxusta, por asustar aos usuarios e limitarse a empresas europeas (deixándoas nunha posición menos competitiva), á vez que o usuario sempre tivo un control efectivo das cookies que se instalan no seu navegador web (as opcións de privacidade permiten elixir o tipo de cookies aceptadas e incluso o seu bloqueo total) polo que trasladar a responsabilidade de empregar un recurso técnico ás empresas parece unha medida excesiva (especialmente cando en moitos casos faise sen o seu coñecemento, xa que son servizos de terceiros os que instalan as cookies nos equipos dos usuarios).