Os múltiples cambios aplicados polas TIC no xornalismo, a debate este xoves da man do CPEIG

Coa segunda metade de setembro, colle folgos -definitivamente- o panorama de actividades de divulgación e reflexión arredor das TIC e as súas implicacións nos máis diversos ámbitos. En boa medida, son as entidades máis ligadas ás tecnoloxías da información as culpables desta divulgación e desta reflexión: queren saber ata que punto incide a materia prima do seu traballo (as TIC) nos demais sectores, procurando en todo intre pór o dedo alí onde se dea unha sinerxía. Ou sexa, alí onde a combinación de dúas cousas dea como resultado algo máis grande ca elas. Precisamente un dos obxectivos da xornada Xornalismo, datos e redes sociais que organiza o Colexio Profesional de Enxeñaría en Informática de Galicia (CPEIG) é avaliar as sinerxías existentes entre Tecnoloxías da Información e Comunicación. A cita é este xoves a partir das 9.45 horas en Santiago.
Máis polo miúdo na Facultade de Ciencias da Comunicación de Santiago, dende as 9.45 ata arredor das 18.00 horas. Nela, participará un nutrido grupo de especialistas en xornalismo e novas tecnoloxías, afondando na influencia das novas tecnoloxías no labor xornalístico, e viceversa. O evento, que conta coa colaboración da AMTEGA e da Facultade de Ciencias da Comunicación, achegará aos asistentes a posibilidade de compartir o desenvolvemento da xornada a través de Twitter, coa etiqueta #xornalismoredes.
Polo que respecta ao programa, abrirá a xeira de actividades o presidente do CPEIG, Fernando Suárez, xunto coa directora da AMTEGA, Mar Pereira, e o vicerreitor de Comunicación e Coordinación da USC, Xosé Pereira. A continuación, será a quenda da intervención da reportuiteira, comunicadora e xestora de redes sociais Laura Camino, quen afondará na cuestión emprendemento-redes sociais, centrándose na súa experiencia no reportuiteo: o xornalismo en 140 caracteres. A continuación, o patrono fundador e director de Civio Fundación Ciudadana, David Cabo, falará da transparencia dos datos e da iniciativa dondevanmisimpuestos.es.
Máis tarde, o vicepresidente do CPEIG, Juan Otero, abordará o tratamento nos medios de comunicación do denominado “erro informático”. Pola súa banda, a produtora e investigadora de contidos dixitais, María Yáñez, introducirá unha perspectiva de xénero co relatorio Muller e comunicación dixital. O director da edición dixital de La Voz de Galicia, Tomás García, pechará as intervencións da mañá co tema Novas perspectivas do xornalismo electrónico. Despois do xantar, a xornada centrarase na mesa redonda Tecnoloxía para a divulgación. Nela participarán o doutor en Ciencias da Información pola USC e doutor en Ciberxornalismo, Manuel Gago, quen abordará o seu proxecto Torre de Mouros; o CEO de Teltek Vídeo Research e coordinador técnico de UVigo-TV, Vicente Goyanes, quen falará da súa experiencia en Vigo iTunes U; e o doutor en Comunicación pola UCM e profesor na USC, Xaime Fandiño, quen exporá o seu proxecto Latencia 0?.