Amnistía Internacional achega un programa para que os activistas saiban se os vixían

A organización Amnistía Internacional vén de lanzar un software de balde e aberto para que as persoas que loitan no mundo a prol dos dereitos humanos estean en disposición de coñecer se os seus computadores persoais están a ser obxecto de seguimento ou vixilancia por parte dos gobernos que alentan ou permiten as vulneracións contra as liberdades que defenden os activistas. Segundo fai saber a ONG, hai estados que están arestora a recorrer a métodos tecnolóxicos de risco, nalgúns casos moi avanzados, para ter acceso aos correos electrónicos dos activistas e dos xornalistas. En boa medida, o obxectivo tamén pasa por intervir a distancia cámaras e micrófonos dos computadores para rexistrar comunicacións e actividades.
A ferramenta en cuestión habilitada por Amnistía chámase Detekt e ten a capacidade de localizar programas de vixilancia de índole spyware nos computadores. O software foi lanzado en parcería con Digitale Gesellschaft, Electronic Frontier Foundation e Privacy International, e foi deseñado polo experto alemán en seguridade informática Claudio Guarnieri. Máis polo miúdo, busca nos ordenadores dos activistas sinais de seguimento externo feitos por programas espías.