Os viveiros da Fundación CEL e do CIE A Granxa, entre as mellores incubadoras do Estado

Non só as nosas empresas TIC obteñen grandes e importantes recoñecementos, senón tamén os centros que acubillan, alentan e impulsan as nosas empresas. Como por exemplo os viveiros de empresas da Fundación CEL Iniciativas por Lugo e do CIE A Granxa (Porriño), que veñen de obter postos máis que salientables na clasificación elaborada pola Fundación Caixas de Aforrro (FUNCAS) e a Universidade Rei Xoán Carlos de Madrid sobre os servizos das incubadoras no ámbito estatal. Segundo este ránking, o viveiro de Porriño está nun máis que meritorio número dez e o de Lugo ocupa o posto número trece entre un total de 353 incubadoras analizadas nas dezasete comunidades. O acubillo da Cidade da Muralla subiría aínda máis na clasificación se se consideran criterios concretos como “incubación básica”, ascendendo ata o sexto lugar.
O estudo de FUNCAS, liderado por Francisco Blanco, profesor titular da Universidade Rei Xoán Carlos, analizou instalacións e servizos concretos de asesoramento, pasando por formación, apoios na tramitación de axudas; programas de difusión do espírito de empresa; tarifas; posibilidade de networking, entre outros.
Segundo engade a entidade lucense, atendendo ao criterio de “difusión do espírito emprendedor” -que avaliaba presenza en Internet, atención ao público, publicacións propias, organización de seminarios, etc.- a Fundación CEL sitúase en oitavo lugar. A conto destes datos, a entidade empresarial valorou positivamente a investigación xa que “permite unha radiografía do apoio que se ofrece ao emprendedor a través dos centros de iniciativas empresariais en España”, dando luz ao traballo de centros “probablemente pouco coñecidos pero non por iso menos eficaces no labor que realizan”.
Como lembraremos, o centro de aceleración empresarial de Lugo acubilla iniciativas tecnolóxico-dixitais de marcados ingredientes innovadores, como por exemplo a comunidade dixital Nudoss (de cuxa presentación falamos recentemente en Código Cero). Nas súas instalacións teñen collido pulo empresas como Agroamb, Multisports Galicia, Gimena, SCA Informática, Alenti, Agronovo, Transmedia, Innolact, IT Tecno, Pleiteando, Gestibeca Sport, Siente Galicia, Tenis Manager, Mamut Technology, Menus.es e Norbio Sostenible.
Pola súa banda, o CIE A Granxa é un viveiro de empresas promovido polo Consorcio da Zona Franca de Vigo e situado no Polígono Industrial da Granxa (O Porriño). No seu seo collen forma iniciativas innovadoras como Accecom, Asextra, Asinova, Bluemobility ou Forestcorte, entre outras moitas.