Na Rede e de balde o Manual galego de língua de AGAL

Xa temos na Rede e en acceso libre (para consulta e descarga) o Manual galego de língua e estilo, manual para introducirnos no galego-portugués da man de AGAL e da autoría de Maurício Castro, Beatriz Peres Bieites e Eduardo Sanches Maragoto. A achega, que foi publicada inicialmente en 2007 (“esgotando-se em poucos meses”, sinalan os seus responsables), é unha reedición dixital datada en 2010, incluíndo a adaptación ao Acordo Ortográfico proposto pola Associaçom Galega da Língua.
Este manual, informa a plataforma, “inclui normas ortográficas, morfossintáticas e lexicais, assim como conselhos estilísticos para a redaçom de textos em galego”. Asemade, engádese, “também conta com amplos glossários toponímicos, campos semánticos galego-espanhol-inglês, falsos amigos galego-espanhol e um guia para evitar a linguagem sexista”. O Manual galego de língua e estilo pode ser consultado e descarregado a través da plataforma Issuu.com.