O youtuber coruñés Wismichu supera os 2 millóns de subscritores

O fenómeno dos youtubers, persoas que acadan grande sona publicando vídeos de seu na Internet e sumando seareiros que seguen fielmente as súas creacións conseguiu callar en Galicia, non só na banda dos espectadores, senón tamén na banda destas novas estrelas da Rede, entre as que destaca especialmente o coruñés Ismael Prego, máis coñecido como Wismichu, que comezou publicando vídeos con gameplays de videoxogos, pero que acadou o éxito ao gravar sesións de Chatroulette (plataforma de videoconferencias vía web nas que se emparella aos interlocutores ao chou) nas que conseguía crear pezas con certo humor negro que conectaron rapidamente co público.

Así, no verán de 2013 puidemos ver como Wismichu participaba no salón multidisciplinar HobbyCon realizando un Chatroulette en directo, evento ao que atraeu a unha boa mostra dos seus 300.000 subscritores en YouTube, deixando claro que non estabamos nun éxito aparente, senón que este tipo de figura pública na Internet tamén goza de poder de convocatoria no mundo real. Wismichu reeditou a súa presenza en HobbyCon en xullo de 2014, momento no que xa superaba os 69 millóns de reproducións na súa canle de YouTube, e tendo en conta os poucos meses que parten dende aquel momento, sorprende enormemente ver como xa superou os 166 millóns de reproducións grazas a que os seus vídeos agora semanais conseguen normalmente entre 1 e 2 millóns de reproducións, de xeito que confírmase que estamos ante un fenómeno que vai moito máis aló do mercado español, conseguindo atraer a numerosos subscritores de América latina, o que permitiu que nas últimas horas conseguise superar a barreira dos 2 millóns de subscritores. Todo un logro para unha canle de YouTube que apenas ten 3 anos de actividade.
Pero todo este éxito non é froito do azar, pois Ismael Prego, que se auto-define como 50% emprendedor e 50% bala perdida, está a canalizar axeitadamente a súa exposición pública para tirar un bo proveito da mesma, orientando a súa carreira profesional ao audiovisual, experimentando constantemente con formatos afastados do tradicional e mantendo sempre a súa canle de vídeos fiel aos seus principios. Todo un exemplo do que a constancia e a boa sintonía co público pode conseguir, coa fortuna de poder converter nunha actividade profesional un proxecto iniciado como diversión.