Santiago sitúase no terceiro posto das cidades estatais mellor valoradas na Internet

Trivago, o comparador de prezos de hoteis en liña, vén de publicar un informe sobre a reputación online dos destinos turísticos españois, analizando todas as provincias e, de xeito individual, corenta cidades españolas. A conclusión tirada é que A Coruña, cunha valoración de 82,22, é a provincia con mellor reputación en liña, seguíndolle o resto de galegas nesta orde: Lugo (80,96), Pontevedra (80,69) e Ourense (80,66). En canto ás cidades, Santiago de Compostela é a terceira mellor valorada con 82,90 puntos, aínda que xa en 2013 foi seleccionada a mellor do Estado. As outras cidades galegas analizadas son Vigo (80,46), no posto 26, e A Coruña (80,40), no 28.
Cómpre subliñar que os usuarios adoitan deixar mellores opinións sobre hoteis pequenos e familiares, onde a atención é máis personalizada. Por iso, as provincias mellor valoradas son as que dependen máis do turismo rural ou de interior e contan con cidades culturais de tamaño pequeno ou medio, onde os aloxamentos son máis pequenos. Fronte a esta tendencia atopámonos cos grandes hoteis urbanos, pero sobre todo de destinos de praia, cos seus grandes complexos, onde os turistas adoitan deixar peores opinións.
A xeito de curiosidade, dicir que Barcelona é con diferenza a provincia con maior número de opinións de usuarios sobre hoteis en Internet, xa que o buscador contabilizou máis de 1.200.000. Da outra banda atópanse as provincias de: Ourense, Albacete, Palencia e Guadalaxara que son as que menos contido en liña posúen sobre aloxamentos, entre as 8.000 e as 9.000.