O CPETIG achega en abril un curso de auditorías e hacking ético

O Colexio Profesional de Enxeñaría Técnica en Informática de Galicia (CPETIG), organiza os vindeiros días 17, 18, 24 e 25 de abril, un Curso sobre Auditoría e Hacking Ético. A actividade, sinala o colexio que preside Marcos Mata, terá unha duración de 25 horas e forma parte da programación da Aula de Formación e Capacitación Profesional do CPETIG. O curso diríxese sobre todo a enxeñeiros técnicos e enxeñeiros en informática e estudantes das enxeñarías en informática. “Con esta acción”, sinala o CPETIG, “os asistentes adquirirán os coñecementos e capacidades precisas para a realización de auditorías de seguridade e tests de intrusión en contornas TIC”.
Deste xeito, engade a entidade profesional, os participantes disporán dos coñecementos teóricos sobre as diferentes tipos de análises existentes así como a capacidade de implementación técnica e práctica das probas que se realizan decote nas distintas modalidades de análise. Amais disto, os alumnos estarán en disposición de prepararen e planificaren un proxecto de auditoría e de realizar os correspondentes informes asociados, así como levar a efecto unha axeitada presentación de resultados.
Para máis información sobre a actividade formativa, o colexio galego lembra que habilitou unha ligazón específica con datos sobre o programa, os formadores, as datas, os prezos, o emprazamento elixido (o Hotel Eurostars San Lázaro de Santiago) e as metodoloxías que debemos seguir para inscribirnos.
Por certo que a formación do curso correrá a cargo de Juan Luis García Rambla, director técnico da área de seguridade TIC de Sidertia Solutions, e máis Ignacio Briones Martínez, enxeñeiro en informática, máster en seguridade e auditoría informática e Certified Informaticon System Auditor (CISA).