Patrick Berry fala este venres en WekCo da xeración perdida da economía real

Este venres 27 as instalacións de WekCo na Coruña (espazo de coworking emprazado na Avenida Novo Mesoiro da Coruña) van dar acollida a un relatorio de Patrick Berry, profesional e innovador con máis de quince anos de experiencia centrando boa parte do seu traballo en adaptar ao eido das empresas semellantes pautas que rexen na natureza en relación co evolutivo: quen innova, perdura e medra. Berry, inglés de nacemento e coruñés de adopción, acode a WekCo cun relatorio (de 10 a 11.30 horas) que sobre o papel ten moito que ver co devandito: O Átomo vs o Bit: Unha xeración perdida na economía real. A sesión tamén xirará arredor de como tantos profesionais de talento tiveron que ir traballar en proxectos dixitais atraidos “baixo falsas premisas en empresas e sectores de crecemento exponencial”.
O relator, que traballou ao longo da súa andaina profesional en grandes multinacionais e creou varias empresas, céntrase arestora na viraxe cara á innovación de produtos e industrias do sector alimentario. Segundo nos lembran dende WekCo, Patrick Berry defínese coma “un eterno buscador de novas formas de agregar valor a través de perturbar o status quo, procurando para iso novos modelos de negocio, propostas de valor e fontes de ingresos”. E engádese: “Está sempre en busca de tecnoloxías disruptivas que presenten un potencial exponencial de crecemento e traballo para que os negocios poidan incrementar o seu valor a través delas”.