O Premio Iniciativa Emprendedora do CPEIG xa ten oito candidatos preseleccionados

A Sétima Noite da Enxeñaría en Informática de Galicia, que se celebrará o vindeiro 26 de xuño en Santiago de Compostela, xa conta con oito candidaturas preseleccionadas de cara ao Premio Iniciativa Emprendedora 2015, que se entregará ao longo desa noite. Deste xeito, fica aberto o prazo para que os colexiados e colexiadas do CPEIG (Colexio Profesional de Enxeñaría en Informática de Galicia) emitan os seus votos e decidan a iniciativa merecente do galardón. Engadir que a votación estará aberta ata o vindeiro 8 de maio.
En canto ás candidaturas seleccionadas, son estas oito:
· Apparcar: Aplicación gratuíta para dispositivos móbiles que lles permite aos condutores localizar as prazas de estacionamento libres máis próximas ao seu destino e reservalas. Baséase nunha metodoloxía sinxela, semellante á empregada para a xestión de reservas de butacas en teatros ou cines. A ferramenta, que pode descargarse para iOS e Android, está a funcionar como proxecto piloto no concello de Compostela.
· Appentra: A súa misión é a de proporcionar ferramentas software de calidade que permitan o uso extensivo das técnicas de computación de alto rendemento (HPC) en todas as áreas de aplicación da enxeñaría, a ciencia e a industria. O seu traballo vai dirixido a empresas e organizacións que actualizan con frecuencia as súas aplicacións de cálculo intensivo en mercados coma o aeroespacial, automoción, enxeñaría civil, biomedicina ou químico.
· iCarto: Creada por membros do Laboratorio de Cartografía de Galicia, o seu obxectivo é o desenvolvemento e a aplicación das Tecnoloxías da Información Xeográfica (TIG) nos eidos da enxeñaría civil, do patrimonio e da cooperación e o desenvolvemento, entre outros. Desenvolven e aplican metodoloxías e programas para a captura, tratamento, análise e representación de datos xeoespaciais.
· Netex Learning: Adicada á aplicación das novas tecnoloxías ao mundo da formación, traballa para dar resposta aos novos retos e necesidades formativas mediante solucións tecnolóxicas innovadoras. Un dos seus últimos proxectos é T-Didacta: dispositivos intelixentes de axuda ao ensino baseados en técnicas de Learning Analytics, que pretende resolver todos os problemas derivados da utilización de tabletas e contornas dixitais de aprendizaxe nas aulas de xeito integral.
· Qubitia Solutions: Desenvolvedora dunha plataforma de software para producir e monitorizar, en tempo real, todo tipo de algoritmos e estratexias de investimento e cobertura para a contorna dos mercados. O obxectivo é darlle resposta á necesidade das entidades de dispor ferramentas que axilicen e automaticen os seus procesos, reducindo tempos e aumentando a seguridade.
· Sixtema: O labor desta empresa compostelá baséase no desenvolvemento de servizos integrais relacionados cos Sistemas de Información Xeográfica, completando todo o ciclo da información, desde a recollida de datos ata a posta en marcha de xeoportais e solucións de mobilidade e xeolocalización.
· Teimas: Empresa de desenvolvemento software orientada a produto, que desenvolve a súa actividade no sector ambiental, centrándose no desenvolvemento de produtos ofrecidos como servizo.
· ViaVigo: Deseñado polo Consorcio Zona Franca de Vigo, este ecosistema para emprendedores busca, a través dun programa de aceleración para o desenvolvemento, darlles soporte e asistencia na súa fase inicial a emprendedores e empresas. Durante un período aproximado de 18 meses, a iniciativa selecciona, forma e promociona os candidatos. O obxectivo é acompañar un grupo de emprendedores na maduración, financiamento e posta en marcha dos seus proxectos.