A galega Truekecasa introduce no mercado inmobiliario en liña o intercambio de propiedades

O negocio inmobiliario envórcase na Rede con firmeza, abrindo novos vieiros de explotación e permitindo aos clientes/internautas múltiples vantaxes de uso. Nesta liña sitúase a marca galega Truekecasa, que vén de introducir no mercado estatal “un innovador modelo de actividade” que, en palabras dos seus responsables, “é totalmente pioneiro en España”. Trátase dun modelo apoiado na fórmula do intercambio de propiedades. A través da web de seu e o servizo de Trueke, quen demande un inmóbel dispoñendo de outro para achegar, obterá xestión directa para a operación.
Para o devandito, engade a empresa emprazada na Coruña, estableceuse “o software máis avanzado do mercado, apoiado nunha páxina web inmobiliaria deseñada a través das últimas ferramentas tecnolóxicas”. O software en cuestión permite á empresa acompañar ao cliente “en todo o proceso”, desde a procura de inmóbeis e asesoramento, ata a entrega das chaves.
Segundo engaden dende a empresa galega, a viabilidade de Truekecasa xa foi probada a través de catro oficinas propias en Galicia. O obxectivo, agora, é iniciar un firme proceso de espallamento polo ámbito nacional. Para afrontar este crecemento, a empresa confiou na metodoloxía de franquías para, a medio prazo, situarse cunha rede de 25 establecementos no eido estatal.
Tal e como lembran os responsables de Truekecasa, a marca comezou o seu desenvolvemento “nun intre no que o mercado inmobiliario está a presentar claros sinais de recuperación”. E engaden: “A reactivación das hipotecas, o medre de emprego, e os prezos baixista das vivendas, vistos polos clientes como últimas oportunidades, favoreceron a reactivación do sector tanto para investidores nacionais como estranxeiros”.