Resolto o concurso en liña de fotografía Paisaxes de Caión

Xa hai gañador do concurso en liña de fotografía Paisaxes de Caión, organizado polo Concello de Laracha a través da iniciativa de desenvolvemento local e turístico Mar de Caión, un proxecto financiado con fondos europeos que vai xa pola súa segunda fase. O certame desenvolveuse entre o 6 de marzo e o 9 de abril de 2015 e a obra gañadora foi Tempo para pensar, de Horacio Rodríguez Rodríguez, quen poderá gozar dun xantar ou cea nun establecemento da Rede de Hostaleiros Mar de Caión, na que se promove a gastronomía local. A dita fotografía foi a máis apoiada en Facebook e recibiu o voto unánime dos membros do xurado.
Nunha fase inicial presentáronse 31 obras, das cales 10 foron seleccionadas por un xurado profesional (Raúl Lorenzo, fotógrafo; Francisco Rojo Villar, fotógrafo; Pedro Tasende, xornalista; e Adrián Viña, gabinete de comunicación do Concello da Laracha) como semifinalistas. No apartado de votación popular entre os membros da páxina de Facebook de Mar de Caión, con 215 gústame, foi escollida xunto con Atardeceres e As estrelas de Caión como unha das tres finalistas. Por último, resultou gañadora por unanimidade do xurado na última fase de selección.
Segundo explican os organizadores do certame, grazas á expectación xerada polo mesmo, o seu potencial de viralidade e as interaccións dos seareiros de Facebook, pasouse durante o período no que ficou activo o concurso dos 795 aos 878 seguidores na dita rede social.