O HULA, Teafortwo, Don’t be a foreigner e Cilenis gañan os Premios InLugo

Esta fin de semana celebrouse finalmente a terceira edición do Congreso #InLugo e con ela, a entrega dos premios do mesmo nome. Segundo lembrou durante a achega de galardóns a entidade organizadora de ambas convocatorias, a Deputación de Lugo, con estas distincións quérese recoñecer inciativas, persoas e organizacións da provincia que fan bo uso da Internet, as novas tecnoloxías e as redes sociais. O acto estivo presidido polo presidente do organismo provincial, José Ramón Gómez Besteiro, acompañado do alcalde de Lugo, José López Orozco. Os gañadores foron o Servizo de Cardioloxía do HULA, Teafortwo, Don’t be a foreigner e Cilenis.
Gómez Besteiro destacou durante o acto de entrega de premios que “con estes galardóns, queremos recoñecer a labor de divulgación dos vosos proxectos así como o aproveitamento das ferramentas que nos ofrece a rede” e afirmou que “Internet, e os seus recursos, permítennos estar máis preto das persoas, feito que os políticos debemos valorar e recoñecer”. Pola súa banda, o alcalde salientou que “este tipo de iniciativas amósannos as novidades no eido tecnolóxico así como os límites que non debemos cruzar”.
Na edición deste ano presentáronse máis de medio cento de candidaturas, entre as que resultaron gañadoras os seguintes profesionais:
· Teafortwo. na categoría de Comercio, Ocio e Restauración, polo uso das novas tecnoloxías e as redes sociais para estar en contacto permanente e ofrecer un servizo continuo ós clientes da tenda. Comezaron a súa aventura no renovado Mercado municipal de Quiroga Ballesteros hai case dous anos e acaban de abrir o seu segundo local en Lugo, no número 98 da rúa Nova.
· A web do Servizo de Cardioloxía do HULA, na categoría de Educación e Formación, pola importancia da difusión de información das doenzas cardiovasculares entre a poboación, “xa que o coñecemento repercute na mellora da saúde dos cidadáns”. Segundo o xurado, “emprega unha linguaxe próxima e accesible, desde a firme crenza de que o paciente empoderado é actor decisivo na sustentabilidade do sistema sanitario”. Asemade, engádese, “colaboran coa formación dos médicos de atención primaria cos seus contidos”. É a primeira web dun servizo de área médica do HULA con enfoque formativo e educativo, “labor que hai que agradecer ao xefe de Cardioloxía do HULA, Carlos González Juanatey, e o seu equipo”, explicou a Deputación.
· Don’t be a foreigner, na categoría de Cultura e Acción Social, por “utilizar fundamentalmente as novas tecnoloxías para a axudar a estranxeiros a establecerse en España, facilitando o proceso de transición tanto a nivel persoal como profesional”. Este verán levarán a cabo o primeiro intercambio Lugo – Charleston (Estados Unidos), grazas ao que catorce nenos poderán vivir con familias americanas. O curso que vén queren facelo á inversa.
· Cilenis, na categoría de Tecnoloxía. É unha empresa spinoff da USC, que converte anos de investigación en tecnoloxía lingüística en software que poda utilizar todo o mundo. Destaca entre elas Linguakit.com, un portal avanzado de ferramentas lingüísticas; a versión en galego de Apalabrados, ou o primeiro teclado corrector en galego para Android. Segundo lembrou o xurado, Cilenis foi recoñecida co 1º Premio de iniciativas emprendedoras da USC, ou Mención de Honra no concurso BGI organizado polo MIT.