O Clúster acada un éxito de participación no seu programa formativo Mini-MBA

Quen mellor que os nosos profesionais TIC para axudarnos a ser mellores xerentes e directivos? Disto trata (de facer colaboración para contribuír a que deamos coa fórmula da dirección eficaz e axeitada) o Programa de Desenvolvemento Xerencial para Empresas TIC, tamén coñecido como Mini-MBA Clúster TIC, unha iniciativa do Clúster que, segundo informa a alianza empresarial da nosa terra, vén de esgotar xa as súas prazas, o que dá unha idea do interese cada vez maior dos nosos responsables empresariais por seren, coloquialmente falando, mellores xefes. E a todos os niveis, non só de coñecemento e habilidades, senón tamén no que atinxe á capacidade de crear axeitadas contornas de traballo.
O programa de formación será impartido pola Escola de Negocios AFundación, no Campus da Coruña, e terá unha duración de 70 horas de docencia presencial na que se tratarán temáticas coma a definición de obxectivos, plans e políticas de dirección; a análise de mercados nacionais e internacionais; a innovación e a mellora de procesos; o soporte económico-financeiro; e o desenvolvemento de persoal directivo.
Dada a imposibilidade de cubrir e atender toda a demanda xerada pola actividade formativa (a convocatoria foi todo un éxito), o Clúster xa está a estudar a posibilidade de facer unha segunda edición antes de rematar o ano.
Esta iniciativa conta con financiamento do IGAPE a través da liña de proxectos colaborativos de capacitación sectorial, cofinanciadas polo Fondo Social Europeo no marco do Programa Operativo FSE Galicia 2007-2013. Diríxese, como dixemos, a optimizar a nosa competitividade empresarial mediante a formación do seu capital humano e a través de proxectos propostos por organismos intermedios e dirixidos a colectivos de empresas galegas.