A música dixital xa lidera as vendas en España

Por primeira vez na historia, a música dixital obtivo máis vendas que a música en formatos tradicionais, máis polo miúdo un 53,9% do volume total de ingresos. Son datos do último informe de Promusicae (asociación española de produtores musicais) referente ao primeiro semestre de 2015, onde se identifica como principal factor deste crecemento ao espallamento do hábito de escoitar música en liña, en streaming. No estudo da plataforma tamén se fai saber que os servizos Spotify, Deezer o Youtube, son as tecnoloxías de música por streaming preferidas polos seareiros.
Estes e outros servizos, incídese, teñen a vantaxe de non requirir descarga de arquivos e de ofrecerse en diferentes modalidades, de balde (con publicidade e opcións algo limitadas) ou en premium, a través do abono dunha subscrición mensual e permitindo o engadido de servizos e de opcións.
Segundo sinalan dende Promusicae, a opción en liña e dixital confírmase “como táboa de salvación para un sector que continúa sufrindo, entre a crise global e o espolio da pirataría, un duro castigo desde o comezo do século XXI”. De feito, nesta primeira metade do ano, a opción dixital é única modalidade de consumo que sobe (30,6 millóns de euros), mentres que todas as demais descenden (a venda de soportes físicos como CD e vinilos caeu nuns 4,9 puntos porcentuais ao pasar dos 33,2 aos 31,6 millóns de euros).