Acer sitúase por enriba de Apple en canto á venda de portátiles 2 en 1

A compañía taiwanesa fabricante de computadoras, Acer, está de celebración pois -segundo informacións internas da empresa- a marca xa superou a Apple no mercado mundial de PC (portátiles e sobremesa) grazas ao seu liderado no sector dos portátiles 2 en 1 (tableta Windows + convertibles) o pasado xullo.
Cómpre informar que o mercado global de dispositivos 2 en 1 medrou a un ritmo do 41% interanual entre xaneiro e xullo de 2015. Así, no mes de xullo, Acer facíase co posto número 1 na rexión EMEA cun 20% de cota de mercado, acadando o primeiro lugar en ata 10 países: Alemaña (22%), Italia (36%), España (23%), Arabia Saudita (42%), Bélxica (25%), Noruega (24%), Dinamarca (35%), Austria (25%), Portugal (28%) e Finlandia (35%).
Segundo datos de GFK do segundo trimestre de 2015, Acer é número 1 en España con máis dun 24% de vendas no segmento de tabletas con Windows e máis dun 33% no segmento de portátiles convertibles.
O primeiro portátil 2 en 1 de Acer vía a luz na primavera de 2014, dende aquela o mercado avanza a bo ritmo grazas á aposta dos usos profesionais e de lecer pola mobilidade.