O CPEIG e AMTEGA amosan este xoves o potencial das profesións TIC no eido da arquitectura

Seguir incidindo no potencial da formación TIC como actividade laboral de longo alcance, desta volta facendo fincapé nas posibilidades da aplicación tecnolóxica no ámbito do deseño e a construción de inmóbeis e espazos urbanos. Este é o gran obxectivo da cita que organizan este xoves 15 o Colexio Profesional de Enxeñaría en Informática de Galicia (CPEIG) e a Axencia para a Modernización Tecnolóxica de Galicia (AMTEGA), falamos da xornada Faite profesional dixital de tecnoloxías informáticas na arquitectura. O encontro insírese na campaña de divulgación e difusión de novos perfís profesionais na era dixital 1 mes, 1 profesión dixital e desenvolverase na Escola Técnica Superior de Arquitectura da Coruña (ETSAC).
Segundo informan as entidades organizadoras, “os asistentes ao evento coñecerán, grazas ás intervencións de destacados expertos e profesionais na materia, novas competencias e habilidades profesionais que se están a demandar no mercado laboral actual no eido da arquitectura”. Máis en detalle, amosarán as características e requisitos do seu labor e perfil profesional, complementando a exposición os relatorios individuais con debates abertos.
O encontro desenvolverase de 17.15 a 20.00 horas no Salón de Actos da ETSAC. A inscrición é libre e de balde, e as persoas interesadas en asistir poden inscribirse a través do enderezo electrónico eventos@cpeig.org ou da web www.profesionsdixitais.org, na que tamén figura o programa e información da iniciativa e dos relatores que participan.
Sobre o programa de actividades, sinalar que trala benvida institucional, a cargo do presidente do CPEIG, Fernando Suárez, e do director da ETSAC, Fernando Agrasar, intervirá Eloi Coloma Picó, consultor especialista en BIM e director do Master en BIM Managament Steering da Universidade Politécnica de Catañuña (UPC) para falar do Impacto das tecnoloxías da información no sector da construción.
A continuación, falará Aitor Almaraz Sánchez, estudante do Master Universitario de Arquitectura da ETSAC cunha charla baixo o epígrafe de Pensando en paramétrico. Contornas dixitais.
Pola súa banda, Luis Antonio Hernández Ibáñez, profesor titular da UDC e coordinador do Grupo de Visualización Avanzada e Cartografía en Arquitectura, Enxeñaría Civil e Urbanismo, falará da Realidade virtual, interacción natural e motores de videoxogo. Tendencias en visualización interactiva de arquitectura.
O último dos relatores será José A. Vázquez, xefe de estudos da ETSAC, quen realizará unha presentación do Obradoiro de Fabricación Dixital da ETSAC. Para rematar a xornada, está previsto un debate entre os relatores e o público.