Kiply presentará en Betabeers Galicia o seu novo software de produtividade persoal

A start-up tecnolóxica galega Kiply vai presentar a nova versión do seu software de produtividade persoal no marco da XXV edición de Betabeers Galicia. A devandita ferramenta, como lembraremos, é unha aplicación que se dirixe en boa medida a optimizar a nosa actividade laboral a través do uso duns recursos ben concretos: os nosos dispositivos. Para acadalo, Kiply xunta tecnoloxía, metodoloxía e un terceiro factor que sempre é de agradecer: consellos para unha vida mellor. Agora, coa nova versión da plataforma, esta incrementa as funcionalidades para que os seus máis de 1.000 usuarios midan de maneira automática en que invisten o seu tempo e melloren a súa produtividade.
No marco de Betabeers Galicia participarán Jose Cánovas Losada, director executivo de Kiply, Cristian Estévez e Santiago García, membros do equipo de desenvolvemento. Xuntos debullarán e amosarán as tecnoloxías empregadas para o desenvolvemento de Kiply, así como a arquitectura de software elixida, entre outras cuestións (por exemplo curiosidades sobre “o día a día de Kiply”).
A tecnoloxía, como recordaremos, está construída sobre a tecnoloxía de Amazon Web Services, empregado un servizo web construído sobre Python e Django Rest Framework e unha aplicación web integrada e aplicada con Angular JS, entre outros recursos TIC. Todos estes, sinalan os responsables da start-up galega, únense para crear un software de produtividade persoal gratuíto que pode descargarse para Windows a través da páxina web kiply.com.
Como fixemos saber no seu día acerca do funcionamento da plataforma, unha vez que instalamos o programa no noso computador, Kiply permítenos recompilar información sobre a nosa actividade de forma automática e “sen que sexa precisa ningunha intervención adicional”. E engade a firma galega: “Grazas a innovadoras técnicas de visualización de datos, poderemos ver en tempo real a que adicamos o noso tempo mentres traballamos con dispositivos electrónicos”.