72 novos enxeñeiras/os en Informática na ESEI de Ourense

Este xoves graduáronse os estudantes do último curso do Grao en Enxeñaría Informática da Escola Superior de Enxeñaría Informática do Campus de Ourense. En total, 72 mozas e mozos celebraron en clave colectiva (con compañeiros, amizades e familiares) o remate da súa andaina formativa no dito centro. Segundo informan fontes da Escola, teñen diante, como futuro profesional, o mellor dos agoiros posibles: a taxa de empregabilidade dos estudos que cursaron é a día de hoxe do 92%. Ademais, a maioría dos estudantes acabados de titular en Enxeñaría Informática acadan un posto de traballo en só dous meses e medio.
O acto de graduación tivo lugar no salón Marie Curie do Edificio Politécnico. A todos os/as estudantes acabados de titulárense, Francisco Javier Rodríguez, director da Escola Superior de Enxeñaría Informática, deulles as grazas “por ter escollido este centro” e felicitounos pola “meta acadada”. Para o futuro que lles agarda, o docente achegóulles dous consellos principais: “A formación permanente e a defensa da profesión, para conseguir que se visualice o papel que ides realizar na sociedade e que, en contra de tópicos”, recalcou, “é moito máis que facer páxinas web”.
Tamén tivo palabras de recoñecemento o padriño de promoción, o docente do centro Francisco Ribadas. “O meu principal consello é que ao longo da súa vida profesional intenten sempre buscar o equilibrio entre a especialización e o coñecemento xeral, que se desenvolvan no seu nicho de especialización pero que non esquezan todo o demais”, destacou.