A creatividade dixital, eixe temático do faladoiro deste venres

O Colexio Profesional de Enxeñaría en Informática de Galicia (CPEIG) e a Axencia para a Modernización Tecnolóxica de Galicia (AMTEGA) organiza este 8 de xullo, venres, unha nova entrega dos seus faladoiros dixitais. A cita, desenvolvida ao abeiro da campaña mutua de divulgación e difusión de novos perfís profesionais na era do coñecemento tecnolóxico, servirá para avaliar a fondo as posibilidades que se nos abren coa creatividade dixital. Celebrarase no Edificio CINC da Cidade da Cultura en Santiago de Compostela, de 09.45 horas a 14.00 horas.
Tras a benvida institucional a cargo do presidente do CPEIG, Fernando Suárez, intervirá Juan Corro, director académico de U-Tad, centro universitario centrado na formación de futuros referentes do mundo dixital, quen se encargará de disertar sobre a Formación e emprego na revolución dos contidos.
A continuación, e logo dunha pausa, falará Manuel Meijide, director de ILUX Visual Technologies e experto no deseño e desenvolvemento de proxectos integrais no eido das Cidades Intelixentes, quen abordará os Mundos dixitais e novos media. Coma último relator da xornada intervirá Roberto Romero, fundador de Future Lighthouse e desenvolvedor de realidade virtual, quen falará de Realidade virtual, novos horizontes.
Como remate celebrarase unha mesa redonda aberta ás preguntas dos asistentes.