Querocantar.gal amosará ao mundo as músicas dos nosos estudantes a prol do galego

Achégase a conmemoración das nosas Letras e as entidades, asociacións e empresas da nosa terra pechan fileiras arredor da lingua e a cultura de noso. Se onte falabamos do compromiso de Feiraco, coas súas vertentes TIC (a libre descarga de obras de Carlos Casares) hoxe move ficha a Deputación de Coruña, que presentou a nova edición (a segunda) do concurso Quero Cantar e a súa arela de levalo, nesta convocatoria, ao centro mesmo do desafío dinamizador e normalizador. Ou sexa, alí onde se cadra é máis preciso promover a necesidade de coidar da lingua propia: os institutos. Quero Cantar, fixo saber a vicepresidenta da Deputación e responsable de Cultura e Normalización Lingüística da entidade provincial, recunca con web de seu (www.querocantar.gal) e coa vontade de servirse dela e das redes sociais para promover as achegas musicais da mocidade ao abeiro deste certame. Na dita web a rapazada poderá, entre outras cousas, votar as súas cancións preferidas ou escoitar/descargar os temas finalistas da anterior edición e (máis adiante) da presente.
O concurso, que foi presentado no IES Arcebispo Xelmírez II de Santiago xunto co coordinador do mesmo, Tono Formoso, diríxese a convidar ao alumnado a facer música a prol do galego. O prazo para participar está aberto ata o 20 de xuño. Haberá dúas modalidades, unha para infantil para nenas e nenos de ata 12 anos e outra para xuvenil para unha idade comprendida entre os 13 e os 16 anos.
No transcurso da cita no IES de Santiago, o coordinador do concurso animou a ler as bases e “idear a modalidade da presentación”, tendo en conta que se pode concorrer cos distintos estilos musicais. “Só se precisa ter unha canción en galego e pode ser en calquera dos estilos”, díxolles a rapazas e rapaces presentes na exposición. Amais de cantar e contribuír á dinamización da lingua, a nosa mocidade poderá votar na Rede para escoller os grupos finalistas que pasarán á final que terá lugar no último trimestre do ano no Teatro Colón da Coruña.

Goretti Sanmartín lembrou que, ademais do premio en metálico para mercar produtos culturais, os dez grupos finalistas gravarán un CD coas súas cancións do que se fará unha edición de 1.000 exemplares e que tamén se distribuirá na Internet.
A nova edición rexistra tamén un aumento da contía dos premios que consistirán en 1.500, 1.000 e 500 € en material escolar ou produtos culturais en galego para 1º, 2º e 3º de ambas as categorías, respectivamente.
Sanmartín e Formoso tamén lembraron que na anterior edición as cancións dos 10 grupos finalistas conseguiron máis de 100.000 reproducións en liña durante o prazo de semifinais, antes de se escoller o grupo gañador, que foi a banda Colaxe de Laxe. Ademais, sinalaron que o disco gravado coas dez finalistas da convocatoria 2016 está dispoñible con libre acceso na Rede.
Os grupos que queiran concorrer a agora deberán presentar a solicitude no modelo normalizado que se obtén nas webs www.dacoruna.gal e www.querocantar.gal, ou no Rexistro Xeral da Deputación achegando a maqueta da composición, a relación de compoñentes do grupo, a descrición das necesidades técnicas e de escenario, a breve biografía do grupo e o documento de aceptación das bases do concurso.