O Portal de Transparencia dos concellos, finalista nos Premios CNIS

O proxecto para crear o Portal de Transparencia dos nosos concellos vén de obter un importante recoñecemento. Máis polo miúdo, foi seleccionado como finalista nos Premios CNIS (Congreso Nacional de Innovación e Servizos Públicos) 2018, na categoría Colaboración Universidade e Administración Pública. Como lembraremos, o proxecto vén da man do Goberno galego, a FEGAMP (Federación Galega de Municipios e Provincias) e a Universidade de Vigo. Ten a súa orixe en 2016, coa sinatura do convenio entre as tres ditas partes, que tiñan o obxectivo común de de acadar a máxima fiabilidade posible na información xerada polos concellos, achegando recursos dixitais para garantir a correspondencia entre o que fan as administracións locais e o que informan.
A plataforma, segundo puidemos saber recentemente, activarase en breve contando coa presenza activa dunha trintena de concellos. O prognóstico é que de maneira progresiva poidan embarcarse no proxecto máis administracións locais. Nun plano máis concreto, o portal diríxese a fornecer á cidadanía de información pormenorizada sobre o funcionamento das administracións locais da nosa terra, “desde as declaracións de bens dos alcaldes e concelleiros, ata información sobre as subvencións, seguimento das tramitacións en liña, etc”.
Detrás do seu desenvolvemento, por parte da Universidade de Vigo, atópase a Rede Localis, unha equipa de traballo formada por docentes e investigadores universitarios e profesionais que traballan no ámbito local e que está xestionada polo grupo de investigación Gen da dita institución académica galega.