As TIC tamén tiveron presenza na Feira de Emprego Universitario de Lugo

Até 20 empresas, algunhas delas do ámbito das TIC, participaron hoxe na primeira edición da Feira de Emprego Universitario de Lugo, que foi inaugurada a primeira hora polo presidente da Deputación, Darío Campos, a alcaldesa Lara Méndez, e o presidente da Escola de Finanzas de A Coruña, Venancio Salcides. A iniciativa, organizada por dita escola coa única colaboración de ambas as dúas institucións lucenses, contou coa presenza de firmas como Softtek (empresa de raizame mexicana e con presenza na nosa terra, adicada ao desenvolvemento de software), Disashop (centrada na distribución de produtos electrónicos prepago), a consultora PWC, Hotusa, Cafés Candelas, Nortempo, BDO Auditoría, Vegalsa-Eroski ou Caixabank.
Todas elas co nexo común de ter presenza na provincia e todas elas co nexo común de andar á procura de perfís laborais para a súa contratación.
A cita tamén acolleu o desenvolvemento de obradoiros de balde para mellorar a carta de presentación laboral das e dos candidatos.
O organismo provincial levou a esta xornada a súa Axencia de Colocación, un servizo de balde que xera sinerxías entre os demandantes e ofertantes de emprego existentes na provincia para “contribuír a unha verdadeira inserción laboral no conxunto do territorio lugués”. Segundo lembrou a Deputación, o primeiro resultado deste traballo é a contratación no mes de maio de 185 lucenses actualmente no paro noutras tantas entidades da provincia.
A entidade que preside Darío Campos tamén mostrou ás empresas da feira os perfís laborais que se adaptan as súas necesidades e forman parte da base de datos da súa Axencia de Colocación, que conta xa coa información profesional de máis de 2.000 lucenses. O organismo provincial tamén recolleu nova información laboral de mozos da provincia no paro co obxectivo de poñelos en contacto con entidades lucenses nas que poidan traballar.
Campos Conde salientou que a Feira de Emprego Universitario “é unha oportunidade única para que a nosa mocidade manteña contactos con recoñecidas empresas de cara a súa inserción laboral. Por este motivo, dende a Deputación, ao igual que dende o Concello de Lugo, dúas institucións que imos da man e compartimos unha firme aposta polo emprego, tivémolo claro dende un principio e decidimos contribuír á celebración desta cita en Lugo”