SIVSA, galardoada polos informáticos asturianos

A galega SIVSA, referente tecnolóxico na nosa terra (creadora de pioneiras plataformas como Fenix e Geenie), vén de obter un novo recoñecemento ao seu labor en materia de desenvolvemento. A distinción, desta volta, veu da man dos Colexios Oficiais de Enxeñeiros e Enxeñeiros Técnicos en Informática de Asturias (COIIPA e CITIPA), que concederon o Accésit Premio Impulso TIC aos proxectos DevOps nos que SIVSA traballa conxuntamente con IECISA e Ricoh. O galardón entregouse na máis recente edición dos Premios Impulso TIC (PiTIC) 2018 que convocan as ditas entidades profesionais.
Os proxectos galardoados teñen por obxectivo a mellora e optimización dos procesos de desenvolvemento, mantemento e operación dos sistemas software da Administración do Principado de Asturias, unha iniciativa que foi encargada pola Dirección Xeral de Tecnoloxías da Información e as Comunicacións do Principado.
Recolleu a distinción Alexander Mateos, que asistiu en representación de SIVSA ao acto de entrega dos premios Impulso TIC, que se celebrou o pasado 14 de decembro en Siero.
Os Premios Impulso TIC, que contan con cinco categorías (Empresa, Social, Educación, Ámbito Local e Mención Especial), son impulsados polos devanditos colexios oficiais para recoñecer aqueles proxectos que destacan polo seu fomento do uso do TIC en diferentes áreas.