70 escolares participaron este sábado na edición galega da World Robot Olympiad

Até setenta rapazas e rapaces de entre os 6 e os 19 anos participaron este sábado na edición galega da World Robot Olympiad, competición mundial de robótica educativa que se celebra cada ano e que con cada nova convocatoria xira arredor dunha temática particular. A actividade, que veu da man da Axencia para a Modernización Tecnolóxica de Galicia (AMTEGA) e Arkitas Robótica, tivo como fío argumental básico as Cidades Intelixentes e os seus principais desafíos.
Os participantes construíron en tempo récord un robot innovador para cada modalidade. As categorías da WRO Galicia foron Regular (WeDo, Elementary e Junior High) e Football. Na xornada houbo 70 rapaces agrupados en equipos participando en Regular e Football.
A proba deste sábado enmarcouse nas iniciativas do Plan DigiTalent para o fomento das vocacións TIC e a especialización dos perfís dixitais. A participación na proba deste sábado é clasificatoria para a fase nacional e a final internacional. A fase estatal, organizada pola Fundación educaBOT, celebrarase en setembro en Platja d’Aro (Girona). Logo desenvolverase a final internacional, o mes de novembro en Hungría. Na edición anterior, tres alumnos do colexio Compañía de María da Coruña xunto cun profesor participaron co seu robot na fase internacional, celebrada en Tailandia.