Vivo anuncia unha carga rápida que completaría a batería dun móbil en 13 minutos

Nos últimos meses os fabricantes de smartphones comezaron a atender unha histórica demanda dos consumidores e están a equipar os seus dispositivos con baterías de capacidades bastante xenerosas, o que fai que a tecnoloxía de carga rápida cobre cada vez unha maior importancia, e aínda que normalmente o grande referente neste ámbito era Qualcomm, o fabricante chinés Vivo está a presumir da súa tecnoloxía Super FlashCharge a 120 watts, que sería capaz de completar a carga dunha batería de 4.000 mAh en só 13 minutos.
Este novo sistema de carga sería capaz de completar a metade da carga da batería en só 5 minutos, e para demostrar que non é unha fantasía, publicaron un vídeo no que podemos ver a carga en funcionamento, quedando por anunciarse os dispositivos que estrearán este sistema de carga, que supón un importante salto dende a carga de 44 watts que ata o momento Vivo tiña como máximo, e tamén superaría ao sistema de carga de 100 watts que Xiaomi anunciou hai uns meses. Espérase que a carga rápida a 120 watts poida verse en vivo a semana que vén no Mobile World Congress de Shanghai.