O CPEIG, crítico con Navantia por non mudar as titulacións para unha oferta de emprego de analista

O Colexio Profesional de Enxeñaría en Informática de Galicia (CPEIG) presentou en maio un escrito ante o Ministerio de Facenda no que se solicitaba a rectificación dunha oferta de emprego de Navantia (empresa pública do Grupo SEPI) na que non se permitía o acceso ás/aos licenciadas/os en Enxeñaría en Informática. Este novo caso de “discriminación coa profesión”, en palabras do CPEIG, achegou estes días novidades sobre o seu desenvolvemento e a súa agardada solución (unha solución que, por desgraza, estase a adiar máis da conta). Segundo confirma o CPEIG, Navantia non retificou a listaxe de titulacións para a súa oferta de emprego de analista. O colexio que preside Fernando Suárez considera que “a resposta da sociedade pública de construción naval prexudica aos colexiados, que ao descoñecer que poden optar ao posto deciden non presentarse”.
Segundo engade, que non se tivera incluído a titulación de Enxeñaría en Informática na listaxe de formación regrada dos requisitos desta oferta pública é un feito que vulnera o establecido na Lei 40/2015 do Sector Público na que se especifica: “O resto do persoal será seleccionado mediante convocatoria pública baseada nos principios de igualdade, mérito e capacidade”.
Como dixemos, o CPEIG presentou hai uns meses un escrito ante o Ministerio de Facenda no que se solicitaba a corrección desta oferta, destinada a cubrir un posto con funcións para proporcionar solucións eficaces para as necesidades de análise de datos e xestión de procesos sobre o sistema de información de Navantia. “Para optar ao posto”, explicaba daquela o colexio profesional galego, “os candidatos deben manexar ferramentas informáticas e uso de volumes elevados de datos, ademais de valorar positivamente o coñecemento a nivel usuario de SAP, ferramentas de xestión de proxectos, financeiras ou contables”.
Porén, engade o CPEIG, na resposta de Navantia ao devandito escrito “só se di que se admiten todo tipo de titulacións e que todas as candidaturas serán tidas en conta para o posto de traballo”. O Colexio profesional considera que “esta postura non evita o prexuízo que se lles causa ao colexiados enxeñeiros en Informática”, que ao descoñecer que poden optar ao posto deciden non presentarse.
O CPEIG considera “fóra de dúbidas” que os enxeñeiros en Informática están plenamente capacitados para a realización das funcións definidas neste posto de traballo, sendo o perfil máis apropiado o da Enxeñaría en Informática.