Fíltranse centos de millóns de números de teléfono de usuarios de Facebook

Por moito que a compañía de Mark Zuckerberg prometa que coida os datos dos seus usuarios, non cesan os escándalos que apuntan o contrario, e desta volta temos unha importante filtración de datos a través dun servidor desprotexido que expuxo máis de 419 millóns de rexistros de numerosas bases de datos de usuarios de todo o mundo, no que se inclúen o identificador de Facebook e o seu número de teléfono. Algúns dos rexistros tamén inclúen o nome, o sexo e o país.
Esta filtración sería bastante grave xa que facilita dende o roubo de contas de usuarios (xa que moitos sistemas empregan o número de teléfono para reiniciar contrasinais) ata a súa exposición a chamadas publicitarias non desexadas.
Aseguran que estes datos terían máis dun ano de antigüidade, pero iso non é un argumento que tranquilice, xa que os usuarios manteñen o seu número de teléfono durante moito máis tempo, polo que temos un caso efectivo de filtración de datos persoais.