Colle impulso en Santiago un proxecto europeo de xestión do patrimonio con Big Data

O Concello de Santiago, da man do concelleiro de Turismo, Sindo Guinarte, inaugurou hoxe a primeira reunión do Big e Open Data para o desenvolvemento de novos procesos cara a xestión do patrimonio atlántico (Bodah), proxecto europeo liderado por Turismo de Santiago no que participan oito entidades de España, Portugal, Francia, Irlanda, Escocia e Gales. A cita, que significou o lanzamento definitivo da iniciativa, celebrouse no Auditorio de Galicia.
O proxecto Bodah ten como obxectivo fortalecer un modelo desenvolvemento sustentable do turismo, dos fluxos de cidadáns e a redistribución dos seus impactos grazas ao uso de datos e de tecnoloxías intelixentes. No Bodah, informa o Concello de Santiago, “desenvolveranse novas ferramentas e solucións en liña cos cambios actuais do sector e integrando características propias dos destinos turísticos intelixentes”. O seu gran cometido é materializar e aplicar ferramentas de xestión que “permitan conciliar os intereses da poboación local e dos visitantes e turistas nas cidades con centros históricos ou espazos de particular interese cultural ou patrimonial”.
No proxecto Bodah participan Turismo de Santiago, Fundación Santa María La Real del Patrimonio Histórico, Fomento San Sebastián, Universidade Nova de Lisboa, Université de Pau et des Pays de l’Adour, Cork Institute of Technology, Glasgow Caledonian University e a Bangor University. O proxecto rematará en decembro do 2021.