Un centenar de persoas encheu a Deputación de Pontevedra para avanzar en empregabilidade

Este 30 de outubro celebrouse no pazo provincial da Deputación da Pontevedra, ao abeiro do proxecto Labora 2020 da entidade provincial, unha xornada de traballo para impulsar a empregabilidade entre as persoas con meirandes dificultades para atopar un posto de traballo. Falouse de adestramento, mercadotecnia dixital, psicoloxía e intelixencia emocional, amais de proporcionarse claves para tender pontes máis firmes entre demandantes de emprego e potenciais contratadoras. A primeira xornada de 2020, á que asistiron máis de 100 persoas, púidose seguir integramente en liña, por streaming, a través da web da Deputación. O deputado provincial Gregorio Agís asistiu á súa apertura.
Un dos puntos máis destacados da xornada foi o relatorio de Laura Chica, psicóloga, escritora, formadora e adestradora experta en intelixencia emocional con máis de 50.000 seareiras e seareiros en Instagram, 35.000 en Twitter e 14.000 en Facebook. A súa conferencia levou o título de Desenvolvemento persoal e coaching e centrouse en como fortalecer as capacidades profesionais que todas e todos levamos dentro. Laura Chica salientou que “ante un mundo complexo e volátil só quedamos nós e os nosos recursos persoais, por iso sempre é o intre de darnos unha oportunidade”.
Pola súa banda a adestradora da Escola Europea de Líderes, Yolanda Villar, centrou a súa charla (o relatorio Superación de barreiras no proceso de busca de emprego: crenzas limitantes) en tres eixes principais: o das capacidades diferenciadoras de cada quen, o noso potencial de autoliderado e na importancia da mercadotecnia innovadora á hora de buscar traballo.